Мино

Мино - (форсӣ). مینا шиша, обгина; осмонранг; гули зинатӣ

Мино ‫مينا‬ 1. ороиши гардан; ҷавоҳири гардан;

2. обгина, шиша (ҳамчун ҷисм, модда); обгинаи рангин, ки рӯи онро бо тилло ё нуқра наққошӣ мекунанд; обгинаи сапед; шишаи шароб; шишаи рангин;

Аз ғами пинҳон нагуфтан мушкил аст,
Бода дар мино нуҳуфтан мушкил аст.
(Иқболи Лоҳурӣ)

3. пиёла; ҷом, қадаҳ, ҷоми шишае, ки бад он шароб хуранд; соғар;

На нарм шавад дилат ба сад лоба,
На гарм шавад сарат ба сад мино.
(Масъуди Саъд)

4. гулест; номи гули зебо;

Ҳар куҷо пӯӣ, зи мино хирманест,
Ҳар куҷо ҷӯӣ, зи дебо хиргаҳест.
(Манучеҳрии Домғонӣ)

5. кабуд, осмониранг, сабзранг; ҷавҳаре аст сабз; ранги кабуд;

Бе бода дил зи сайри чаман во намешавад,
Гул ҷонишини сабзаи мино намешавад.
(Калими Кошонӣ)

6. зумуррад;

7. осмон; киноя аз осмони обӣ; само, сипеҳр;

Ҷуръаи ҷом бар ин тахти равон афшонам,
Ғулғули чанг дар ин гунбади мино фиканам.
(Ҳофиз)

8. номи парандае мебошад;

9. шароб;

Қазо лабрез дорад душманатро
Зи хуни дидаву дил ҷому мино!
(Фароҳонӣ)

10. ойина;

Биё, соқӣ, аз шиша мино бидеҳ,
Ба ин ташна обе зи дарё бидеҳ.
(Мулло Туғро)

11. киноя аз дунё; олам, кавн, даҳр;

Агар Марям бирафт аз дайри мино,
Ба гетӣ зиндаҷон бодо Масеҳо!
(Низомии Ганҷавӣ)