Меъроҷ

Меъроҷ - (арабӣ). معراج нардбон, зинапоя, болобароӣ *
*Шаби 27-уми моҳи раҷаби соли қамарӣ, ки дар он Муҳаммад (с) бо Худованд мулоқот кардааст ва мусулмонон ин рӯзро ид (иди Раҷаб) мекунанд.

Меъроҷ (арабӣ) ‫معراج‬ 1. он чӣ ба воситаи он боло мебароянд; нардбон; пиллакон; он чи ба василаи он боло раванд, масъад, маъраҷ; ҷойи боло рафтан ва баланд гардидан;

Ба авни уммати мискину муҳтоҷ,
Шафоатро ба боло карда меъроҷ.
(Хусрави Деҳлавӣ)

2. дараҷот;

Зи меъроҷи мансаб маҷӯ пойдорӣ,
Ки бар ях бувад пой ин нардбонро.
(Соиби Табрезӣ)

3. баболоравӣ, болобарӣ, уруҷ кардан;

Ҳар даме ӯро яке меъроҷи хос,
Бар сари тоҷаш ниҳад Ҳақ тоҷи хос.
(Румӣ)

4. авҷ, улвият, аълоӣ; баландӣ;

Ба ҳайратгоҳи ин меъроҷи қудрат
Надорад ҳеч шоир боли ҷуръат.
(Абдулқодири Бедил)

5. дар яке аз шабҳо ба олами улвӣ ба боло рафтани Муҳаммад пайғамбар (с); суъуди пайғамбари ислом ба осмон, ки яке аз мӯъҷизоти ӯ маҳсуб мешавад.

Шаб аз чатри меъроҷи ӯ сояе
В-аз он нардбон осмон пояе.
(Низомии Ганҷавӣ)